Pixar “Koko siri 2” multfilmi 2029-yilda chiqishini ma'lum qildi

Manba: “Daryo”

D23 ko'rgazmasida Disney filmning yangi konsept-artlarini taqdim etdi. Ularda o'smir yoshiga yetgan Migel o'zining sevimli iti Dante bilan birga tasvirlangan. Shuningdek, kompaniya Pixar sikveli 2029-yilning noyabr oyida prokatga chiqishini va Benjamin Brett Ernesto de la Kruz rolini ijro etish uchun qaytishini ma'lum qildi.

“Koko siri” asl multfilmining rejissyori Li Unkrich film ustida ishlash uchun Adrian Molina bilan birga qaytmoqda. “O'yinchoqlar tarixi 4” va “Boshqotirma 2” filmlari orqali tanilgan Mark Nilsen esa prodyuserlik qiladi.

O'liklar kunini nega quvonch bilan nishonlashadi? “Koko siri” multfilmi haqida

Birinchi “Koko siri” multfilmi 2017-yilda kinoteatrlarda namoyish etilgan va tanqidchilar va tomoshabinlar ham tomonidan xit asar sifatida e'tirof etilgan. U dunyo prokatida 800 million dollardan ortiq mablag' to'plab, ikkita “Oskar” mukofotini qo'lga kiritdi: “Eng yaxshi animatsion film” va “Remember Me” nomli “Eng yaxshi original qo'shiq” uchun.

Foto: Filmdan kadr

“Koko siri 2” – Pixar studiyasining navbatdagi sikveli bo'lib, uning ijodkorlari studiyaning so'nggi o'n yilliklardagi eng katta yutuqlaridan unumli foydalanishga umid qilmoqda. Studiyaning so'nggi relizlari qatorida dunyo bo'ylab 1 milliard dollardan ko'proq daromad keltirgan “O'yinchoqlar tarixi 5” va “Boshqotirma 2” kabi filmlar bor. Studiyaning keyingi sikveli – “Superoila 3” bo'lib, uning premyerasi 2028-yilga rejalashtirilgan.

Manba: Daryo.uz

“Interstellar” emas: Metyu Makkonahi qaysi film unga katta daromad keltirganini aytdi

Gollivud yulduzi Metyu Makkonahi “Happy Sad Confused” podkastida 2003-yilda chiqqan “Garovdagi muhabbat” romantik komediyasi uchun eng katta gonorar olganini aytdi. Aktyorning so'zlariga ko'ra, film unga hanuzgacha pul keltirayotgan daromad manbayi bo'lib qolmoqda.

“Garovdagi muhabbat” — men suratga tushgan romantik komediyalar ichida eng sevimlisi. Uni juda ko'pchilik yaxshi ko'radi. Film hanuzgacha menga boshqa barcha filmlarimga qaraganda eng katta gonorar olib keladi. Farq juda katta”, deydi aktyor.

Foto: “Garovdagi muhabbat” filmidan

Aktyorning aytishicha, DVD davrida va filmlar kabel televideniyesida namoyish etilgan paytlarda bu to'lovlar, ayniqsa, katta bo'lgan. Har yili mart oyida filmga qiziqish oshgani sababli u mo'maygina pul olgan.

“Garovdagi muhabbat” filmida Makkonahi muvaffaqiyatli reklama mutaxassisi rolini ijro etgan. U istalgan ayolni 10 kun ichida o'ziga oshiq qila olishiga garov o'ynaydi. Buning uchun jurnalist qizni tanlaydi. Ammo u qizning ham o'ziga xos vazifasi borligini bilmaydi — u ham erkakni 10 kun ichida o'zidan voz kechishga majbur qilishi kerak.

Film rejissyori Donald Petri bo'lgan. Makkonahining partnyorini Keyt Hadson ijro etgan. Film aktyor romantik komediyalarda faol suratga tushgan davrda ekranlarga chiqqan. Uning boshqa shu janrdagi filmlari qatorida “To'y tashvishlari”, “Muhabbat va ko'ngilsizliklar” hamda “Ahmoqlar oltini” bor.

Foto: “Bizning so'nggimiz” filmidan

Aktyor, shuningdek, “Bizning so'nggimiz” serialida Joel rolini ijro etish taklifini jiddiy ko'rib chiqqanini ham aytdi. Biroq oxir-oqibat bu taklifni rad etgan. Uning so'zlariga ko'ra, ssenariy juda yaxshi bo'lgan, ammo o'sha paytda u yozuvchilik va prodyuserlik faoliyatiga e'tibor qaratmoqchi bo'lgan va serialga bir necha yil vaqt ajratishni istamagan.

“Bizning so'nggimiz” seriali

Manba: Daryo.uz

Instagram: Prezidentdan mukofot olgan Otabek Mahkamov, yangi mashinali bo'lgan Huvaydo Jumayeva, turmushga chiqqan “o'zbek Shakirasi”

Jahon va o'zbek shou-biznesi vakillarining Instagram sahifalariga joylashtirilgan qiziqarli foto va videolarini e'tiboringizga havola qilamiz.

Xonanda Malika Ravshanova tig'iz ish kunida ham farzandlariga vaqt ajratishga ulgurmoqda.

Foto: Instagram

Aktrisa Marjona Mirzaaliyeva Dubay shahriga sayohatidan suratlari bilan bo'lishdi.

Huquqshunos, taniqli bloger va aktyor Otabek Mahkamov prezident tomonidan “Mardlik” ordeni bilan mukofotlandi. U ushbu e'tirofni marhum onasi va buvisiga hamda barcha obunachilariga bag'ishlagani haqida yozib qoldirdi.

Turk aktrisasi Tuba Buyukustun yozgi ta'tildagi suratlari bilan ko'rinish berdi.

Xonanda Shahlo Salayeva farzandi va onasining sog'lig'i uchun obunachilaridan duo so'ramoqda.

Aktrisa, boshlovchi Sitora Farmonova ukasi bilan yangi sayohat sari yo'l oldi.

Aktrisa Huvaydo Jumayeva yangi avtomobil sotib olib, quvonchini obunachilari bilan bo'lishdi.

Xonanda Ziyoda chet eldagi sayohatidan fotosessiyasini sahifasiga joyladi.

Bollivud yulduzi Kajol hazil aralash “Mening maslahatlarimga amal qilib xato qilganlarning xatolaridan ham saboq olaman”, deb yozmoqda.

Tinglovchilari orasida “o'zbek Shakirasi” nomi bilan tanilgan xonanda Maftuna Xolmurodova turmushga chiqdi. To'yda Mashhur Muhammad, Ma'murbek Xolmedov va bir qancha san'atkorlar xizmatda bo'ldi.

Manba: Daryo.uz

Taxallus ortidagi haqiqat: Gollivud afsonalari nega o'z familiyasini yashirgan?

Biz bu ismlarni juda yaxshi taniymiz. Ammo biz bilgan ko'plab Gollivud yulduzlarining ismlari aslida shunchaki taxallusdir. Ularning har birining ortida o'ziga xos hikoya yashringan: kimdir boshqa hamkasblari bilan adashib ketmaslik uchun, kimdir esa shunchaki sahnada yorqinroq ko'rinish uchun o'ziga yangi ism tanlagan.

Aktrisaning haqiqiy ismi — Juli Enn Smit.

Foto: “Kino mail.ru”

“Oskar” mukofoti sovrindorining Gollivuddagi ilk qadamlari oson kechmagan. U Aktyorlar kasaba uyushmasidan ro'yxatdan o'tmoqchi bo'lganida, xuddi shu ismli aktrisa allaqachon borligini bilib qoladi. AQSHda Smit familiyasi juda keng tarqalgan bo'lib, bu yosh aktrisaning tanilishiga xalaqit berardi.

Juli Enn ismini o'zgartirishni umuman xohlamagan, biroq kelajagi uchun tavakkal qilishga majbur bo'ladi. U o'ziga familiya sifatida otasining familiyasi — Murni tanlaydi. Hech kimning ko'nglini og'ritmaslik uchun esa o'zining Juli ismiga onasining familiyasini qo'shib yuboradi. Shu tariqa, “Katta Lebovski”, “Gannibal”, “Ahmoqona sevgi” kabi o'nlab filmlar yulduzi Julianna Mur nomi dunyoga keladi.

Aktrisaning haqiqiy ismi — Vaynona Lora Xorovits.

Rejissyor Tim Byortonning ”Bitljuis, Bitljuis” filmi orqali ekranlarga qaytgan 90-yillarning afsonaviy aktrisasi aslida Xorovitslar oilasidan. Uning taxallusi aktrisaning ilk filmi — “Lukas” uchun o'tkazilayotgan sinov jarayonida to'satdan miyasiga kelib qolgan. Yosh aktrisadan titrlarda ismini qanday yozishni so'rashganda, u o'ylanmay: “Vaynona Rayder”, deb javob beradi. Keyinchalik aktrisa rejissyor bilan gaplashib turganida, xonada orqa fonda xonanda Mitch Rayderning musiqasi yangrayotgan bo'lgani uchun ham shu familiyani tanlaganini aytgan.

Uning ismida ham o'ziga xos sir bor. Aktrisaga Vaynona ismi u tug'ilgan Minnesota shtatidagi Vaynona shahri sharafiga qo'yilgan. Ikkinchi ismi Lorani esa otasining yaqin do'sti, mashhur yozuvchi Oldos Xakslining rafiqasi sharafiga berishgan.

Aktyorning haqiqiy ismi — Erik Marlon Bishop.

Mashhur musiqachi Rey Charlz haqidagi “Rey” filmi uchun “Oskar” olgan bu aktyor o'z faoliyatini stendap shoulardan boshlagan. O'shanda yosh qiziqchi Bishop bir narsaga e'tibor qaratadi: qiziqchi ayollar juda kam bo'lgani uchun dastur tashkilotchilari ularni doim birinchi bo'lib sahnaga chiqarishardi. Shunda u ayyorlik ishlatib, ham erkakka, ham ayolga to'g'ri kelaveradigan universal ism — Jeymi Foks taxallusini oladi.

Yangi ism Foksga nafaqat sahnadan joy kafolatladi, balki tayyor qiziqarli sahna ko'rinishini ham taqdim etdi. Shou boshlovchisi: “Jeymi Foks, u shu yerdami?” deb chaqirganida, tomoshabinlarning qarsaklari ostida sahnaga kutilmaganda baquvvat va kelishgan erkak chiqib kelardi. Aytgancha, Foks familiyasini u boshqa bir mashhur qiziqchi Red Foks hurmati uchun tanlagan.

“Cho'qintirgan ota” va “Manxetten” filmlari yulduzi Aktyorlar gildiyasida allaqachon boshqa bir Dayan Xoll ro'yxatdan o'tgani uchun onasining qizlik familiyasi — Kitonni olishga majbur bo'ladi.

Biroq kinoda u baribir o'zining haqiqiy familiyasiga qaytdi. Rejissyor Vudi Allen u uchun maxsus “Enni Xoll” filmini yozadi va bosh qahramonga aktrisaning haqiqiy familiyasi — Xollni hamda uning bolalikdagi laqabi Ennini beradi. Aynan shu rol Dayanga 1978-yilda “Oskar” mukofotini taqdim etadi.

Manba: Daryo.uz

Juda tez rep o'qish va eng ko'p selfi: Ginnesning rekordlar kitobiga kirgan Gollivud yulduzlari

Ginnesning rekordlar kitobiga kirish uchun odamlar yillar davomida kuchlarini sinab ko'rishadi, ammo quyidagi mashhurlar hatto o'z oldilariga bunday maqsad ham qo'ymasdan jahon rekordini o'rnatishga muvaffaq bo'lgan.

Foto: thrvoicemag.ru

Kichik Robert Dauni “Temir odam 3” filmining premyerasi uchun Xitoyga birinchi tashrifi chog'ida yangi rekord o'rnatishga muvaffaq bo'ldi. Aktyorga Ginnesning rekordlar kitobiga kirish imkonini beruvchi 5339 nafar muxlis tomonidan imzolangan otkritka sovg'a qilindi.

Robert bu e'tibordan hayratda qoldi va rasmiy sertifikatni olgach, u otkritkani o'zining zamonaviy san'at kolleksiyasiga qo'shishini aytdi.

Londonda bo'lib o'tgan “San-Andreasning parchalanishi” filmining jahon premyerasida aktyor atigi 3 daqiqa ichida muxlislari bilan 105 ta selfi suratga olishga muvaffaq bo'ldi. Aktyor rekord o'rnatishga urinib ko'rdi. Garchi xira va to'liq bo'lmagan tasvirlar diskvalifikatsiya qilingan bo'lsa-da, tanlangan 105 ta rasm unvonni qo'lga kiritish uchun yetarli edi.

Aktyor Instagram'da tez-tez sport bilan shug'ullanayotgani haqidagi suratlarni joylashtiradi va selfini mushaklar uchun ajoyib mashq, deb hisoblaydi.

Jennifer Eniston Ginnesning rekordlar kitobiga yaqinda va kutilmaganda kiritildi. Aktrisa ijtimoiy tarmoqda atigi 5 soat 16 daqiqada ro'yxatdan o'tib, million obunachiga ega bo'ldi. Aktrisaning sahifasiga tashrif buyurishni istaganlar sonining ko'pligi tufayli ijtimoiy tarmoq texnik muammolarga duch keldi va bir muncha vaqt aktrisaning do'stlari ham akkauntga obuna bo'la olmadilar.

Shu tariqa Jen 5 soat-u 45 daqiqada ilk millionini yig'gan shahzoda Garri va Megan Marklning rekordini yangilashga muvaffaq bo'ldi.

Lotin amerikalik qo'shiqchi Shakira bir necha bor Ginnesning rekordlar kitobiga kirgan.

Birinchi rekordini u 2005-yilda o'rnatgan. Albomi sotuvga chiqqanidan bir hafta o'tgach, AQSHda eng ko'p sotilgan albomga aylandi (157 000 nusxa). O'sha yili “La Tortura” qo'shig'i eng ko'p sotilgan ispan singli deb topildi. 2017-yilda esa Shakira Facebook'da 100 million layk to'plagan dunyodagi birinchi odam bo'ldi.

Shakira sobiq turmush o'rtog'i, futbolchi Jerar Pikening xiyonati haqida kuylagan qo'shig'i tufayli yana bir bor Ginnesning rekordlar kitobiga kirdi.

Foto: Getty Images

Jastin Biber doimiy ravishda yuqori natijalarga erishadi. 2017-yilning o'zidayoq u Purpose albomining muvaffaqiyati bilan bog'liq 8 ta rekordni yangiladi.

Afsuski, u olgan har bir unvonni muvaffaqiyatli deb bo'lmaydi. YouTube'dagi Baby qo'shig'iga ishlangan klip dunyodagi eng ko'p dislayklar bo'yicha rekordni yangilagan (9,9 million).

Mashhur amerikalik reper Eminem koplab rekordlarga ega, ammo ularning eng muhimi iste'dod va maxsus mahorat talab qiladi.2013-yilda u qo'shiqlaridan birida eng tez rep o'qish bo'yicha rekord o'rnatdi. Rap God'da u 6 daqiqa 4 soniyada 1560 ta so'z o'qiydi, bu soniyada o'rtacha 4,28 so'zni tashkil etadi. Shundan so'ng u ikki marta o'z rekordini yangilashga muvaffaq bo'ldi. Joriy yilning boshida reper uzoq kutilgan albomini chiqardi va muxlislarni yangi natija bilan hayratda qoldira oldi, Godzilla trekida u soniyasiga 7,23 so'z aytadi.

Billi Aylish endigina 18 yoshda va o'zining qisqa faoliyati davomida u aqlbovar qilmaydigan cho'qqilarni zabt etishga muvaffaq bo'ldi. 2020-yilda qo'shiqchi to'rtta asosiy “Gremmi” nominatsiyasida (“Yil albomi”, “Eng yaxshi yangi ijrochi”, “Yil qo'shig'i”, “Yil rekordi”) g'olib chiqqan yagona ayol va eng yosh xonanda bo'ldi. Shuningdek, u Jeyms Bond filmi uchun saundtrek yozgan eng yosh musiqachiga ham aylandi.

Ginnesning rekordlar kitobi

Manba: Daryo.uz

Katta byudjet va yulduzli aktyorlar ishtirokiga qaramay, kassada muvaffaqiyatsizlikka uchragan filmlar

Kinostudiyalar, albatta, foyda uchun filmlar ishlab chiqaradi. Lekin har bir chiqarilgan kartina ijodkorlarga daromad olib kelmaydi. Bundan tashqari, katta budjet ajratilgan va taniqli aktyorlar ishtirok etadigan loyiha ham muvaffaqiyatsizlikdan sug'urtalanmagan.

Foto: AdMe

Ushbu myuzikl IMDb reytingi 10 balldan 2,8 ballni tashkil qiladi. Film jami 6 ta anti-mukofot “Oltin malina” olgan — bu 95 million dollarlik umumiy budjetga va barcha yulduzlar tarkibiga qaramay. “Mushuklar”da bosh rollarni Idris Elba, Teylor Svift, Judi Dench va boshqa mashhur aktyorlar ijro etgan. Myuzikl atigi 75,5 million dollar ishlab topdi.

“Jungli bo'ylab kruiz” (2021)

Ushbu sarguzasht filmining budjeti 200 million dollarni tashkil etadi. Hatto 10-15 yil oldin bunday mablag' kino ishlab chiqarish uchun fantastik bo'lib tuyulgan bo'lsa, bugungi kunda bu blokbasterlar uchun odatiy hol sifatida qabul qilinmoqda. Lekin, afsuski, kinoteatrlarda kartina atigi 220 million dollardan sal ko'proq daromad keltirdi. Filmdagi bosh rollarni esa Dueyn Jonson, Emili Blant, Jessi Plemons, Pol Giamatti va boshqalar ijro etgan.

“Ko'rinmas patrul” (2013)

Xuddi shu nomdagi komiksga asoslangan komediya dahshatli tanqidlarga sazovor bo'ldi va 78 million dollar (budjetga qarshi 130 million dollar) yig'ib, kassadan tushib ketdi. Film bosh qahramonlarini Jeff Brijs, Rayan Reynolds, Kevin Bekon va boshqalar ijro etgan.

Kianu Rivz bu fantastik filmda samuray rolini o'ynagan. Bunday super yulduz barcha kino ishqibozlarining sevimlisi bo'lishiga qaramay, film tanqidchilarning salbiy baholarini oldi va kassada muvaffaqiyatsizlikka uchradi. Bundan tashqari, “47 ronin” filmi yapon tomoshabinlarini ham hayratda qoldira olmadi, Budjeti 175 million dollar bo'lgan film 150 million dollardan sal ko'proq daromad olishga muvaffaq bo'ldi.

Dohiy ixtirochi va muqobil o'lchamga sayohat qilayotgan o'smir haqidagi ushbu ilmiy-fantastik film xarajatini zo'rg'a qopladi. Kinoteatrlarda chiptalar sotuvi filmning 190 million dollarlik budjyetiga nisbatan 209 million dollar keltirdi, ammo marketingga 90-140 million dollar sarflandi. Shunday qilib, film o'zini o'zi qoplashi uchun kamida 850 million dollar, ya'ni suratga olish va reklama uchun sarflanganidan 3-4 barobar ko'p daromad olishi kerak edi. Loyihani hatto Jorj Kluni va Xyu Lori kabi yulduzlarning ishtiroki ham saqlab qololmadi.

“Amsterdam” 2022-yilda kassada muvaffaqiyatsizlikka uchradi, tanqidchilar filmni haddan tashqari shuhratparast Rassellning ssenariysi va rejissyurasini zaif deb rad etishdi. Maqtov faqat butun aktyorlar ijrosi va vizual komponentlarga berildi. Ammo bu filmni saqlab qolmadi. Budjeti 80 million dollar bo'lgan “Amsterdam” bor-yo'g'i 31 million dollar ishlab topdi. Filmda Kristian Beyl, Margo Robbi, Rami Malek, Zoi Saldana, Robert De Niro, Mayk Mayers, Maykl Shennon, Kris Rok, Anya Teylor-Joy, Teylor Svift va boshqalar ishtirok etgandi.

“Yovvoyi chaqiriq” (2020)​

1890-yillardagi oltin vasvasasi paytida bo'lib o'tgan ushbu sarguzashtli film kassada 111 million dollardan sal ko'proq daromad oldi, xarajat esa 135 million dollarga tushgandi. Jek Londonning klassik romani ekran variantida yulduzlar Xarrison Ford va Omar Si rol o'ynagan.

The New York Times ushbu filmni suratga olish va sotish studiyaga 375 million dollarga tushganini taxmin qilgan va buning uchun u butun dunyo bo'ylab kamida 650 million dollar ishlab topishi kerak edi (va bu teatr daromadlarini o'z ichiga olmaydi). Ammo kartina bor-yo'g'i 260 million dollar yig'ishga muvaffaq bo'ldi. Eslatib o'tamiz, bu vestern komediyasida bosh rollarni Jonni Depp, Helena Bonem Karter va boshqalar ijro etgan.

Qahramoni o'zining yoshroq kloniga duch keladigan film, foyda uchun prokat qiymati 138 million dollarni tashkil etgan holda, kassada qariyb 173,5 million dollar yig'di. Taxminlarga ko'ra, film butun dunyo bo'ylab eng kamida 275 million dollar yig'ishi kerak edi. Mutaxassislarning hisob-kitoblariga ko'ra, film studiyaga 111 million dollar sof zarar keltirgan. Eslatib o'tamiz, filmdagi bosh rollarni Uill Smit, Klayv Ouen, Meri Elizabet Uinstid va boshqalar ijro etgan.

Ushbu 2017-yilgi sarguzasht filmi “Mo'miyo” franshizasining qayta ishlangani. Undagi asosiy rollarni taniqli kino yulduzlari Tom Kruz va Rassell Krou ijro etgan. Yangi “Mo'miyo” 410 million dollar yig'di, bu suratga olish va marketing budjeti – 345 million dollardan ancha ko'p. Ammo hisob-kitoblarga ko'ra, film kassada kamida 450 million dollar yig'ish kerak bo'ladi. Natijada Universal Pictures 60–100 million dollar yo'qotdi

“Matritsa: Tirilish” (2021)​

2021-yil oxirida “Matrisa” kult-filmining 4-qismi chiqdi. Avvalgi qism 2003-yilda chiqarilgan. Tanqidchilar asosiy aktyorlarning (Kianu Rivz, Kerri-Ann Moss) ijrosini, harakatlar ketma-ketligini, musiqani, rejissorlikni, vizual effektlarni yuqori baholadilar. Shunga qaramay, kartina kassada uni ishlab chiqarishga sarflanganidan ham kamroq yig'ildi: 190 million dollarga nisbatan 159 million dollar.

Filmda Rivz va Mossdan tashqari Priyanka Chopra, Kristina Richi, Jada Pinkett-Smit va boshqalar o'ynagan.

“Mo'jiza ayol 1984” (2020)​

Foto: Filmdan kadr

Ushbu superqahramonlik filmida bosh rollarni Gal Gadot, Kris Payn, Robin Rayt va boshqalar ijro etgan. Film budjeti 200 million dollarni tashkil etgan bo'lsa-da, 169,5 million dollardan sal ko'proq daromad oldi. The Hollywood Reporter kinostudiyaga 100 million dollar zarar keltirishi mumkinligini yozdi.

“Terminator: Qora taqdirlar” (2019)​

“Terminator” franshizasining 6-qismida Linda Xemilton, Arnold Shvarsenegger va boshqa yulduzlar o'ynagan. Loyihada birinchi ikkita “Terminator”ning rejissori Jeyms Kemeron ishtirok etgani uchun filmga katta umidlar bog'langan edi. Film 260 million dollar ishlab topdi, ammo marketing va tarqatish uchun qo'shimcha 80-100 million dollar sarflangan bo'lsa, film butun dunyo bo'ylab 450 million dollardan ko'proq daromad keltirishi kerakligi taxmin qilingan.

“Men qizaryapman” (2022)​

2022-yilda Pixar va Uolt Disney studiyalari “Men qizaryapman” to'liq metrajli multfilmini chiqardi. Animatsion film nasliy tavqi la'nat tufayli kuchli his-tuyg'ularni boshdan kechirganida bahaybat qizil pandaga aylanib qoladigan qiz haqida hikoya qiladi. Multfilm juda muvaffaqiyatli bo'ldi va u “Eng yaxshi animatsion film” nominatsiyasida “Oltin globus” va “Oskar” mukofotlariga nomzod bo'ldi.

Biroq “Men qizaryapman” prokatda bor-yo'g'i 20 million dollar ishladi va 175 million dollar sarflandi. Natijada ushbu multfilm “Eng katta pul yo'qotishlari” ro'yxatida 1-o'rinni egalladi.​

“Terminator: Qora taqdirlar”

Manba: Daryo.uz

Afsonaviy “Titanik”: 30 yil davomida ko'pchilik payqamagan xatolar

Yaqinda ekranlarga chiqqaniga salkam 30 yil to'ladigan Jeyms Kemeronning “Titanik” filmi o'z davrida kino olamida katta muvaffaqiyat qozongandi. Bir urinishda 11 ta “Oskar” mukofotini qo'lga kiritgan ushbu kartina uzoq vaqt davomida tarixdagi eng kassabop filmlardan bo'lishga ulgurdi.

Biroq har qanday keng ko'lamli loyihada bo'lgani kabi ushbu film ham xato va kamchiliklardan xoli emas. Muxlislar sevimli filmlarini qayta-qayta tomosha qilib, xato va kamchiliklarini aniqlashdi.

Haddan tashqari murakkab kema

Foto: Kino Mail

Rejissyor Jeyms Kemeronning materiallarga o'ta sinchkovlik bilan yondashishini inkor etib bo'lmaydi. Suratga olish jarayonida afsonaviy kemaning aniq chizmalari ko'tarilib, ular asosida nafaqat ichki jihozlar, balki xonalarning bir-biriga nisbatan joylashuvi ham qayta tiklangan. Ammo shunga qaramay, baribir ba'zi kamchiliklar ko'zga tashlanadi.

Masalan, kema yo'lga chiqqan paytda kamera kema vintlarining sinxron ravishda aylana boshlaganini ko'rsatadi. Vaholanki, to'g'ridan-to'g'ri rul ortida joylashgan markaziy vint faqat ochiq dengizda ishlatilgan va portda harakatsiz turgan. Bundan tashqari, vintlar butun va quyma bo'lib ko'rinadi, biroq 1912-yilda bunday konstruksiyalarni payvandlash texnologiyasi hali o'zlashtirilmagan edi. Qizig'i, ushbu xato “Titanik” cho'kayotgan, ya'ni vintlar suvdan ko'tarilgan sahnalarda takrorlanmagan — u yerda vint parraklarini valga mahkamlab turgan boltlar yaqqol ko'rinadi.

Kemaning to'liq o'lchamli maketini qurish o'ta qimmatga tushgani sababli “Titanik” o'sha yillari urf bo'la boshlagan kompyuter grafikasi yordamida suratga olingan. Bu holat kema ustidan panorama olingan sahnalarda odamlar soyasining noto'g'ri tushishidan yaqqol seziladi. Yirik planlarda ham xatolar bor: masalan, Rouzning mashhur “uchish” sahnasidagi kema burni Jek delfinlarni tomosha qilgan joydagi kema burnidan sezilarli darajada farq qiladi.

Kemeron uchun eng katta qiyinchilik filmning tarixiy xarakterga egaligi edi. “Titanik” 1912-yilda — dunyo butunlay boshqacha bo'lgan davrda cho'kib ketgan. Filmda uchraydigan ko'plab xatolar aynan shu bilan bog'liq.

Masalan, Jek Rouzni kemaning quyi qismidan okeanga sakrash fikridan qaytarayotganda, Vissota ko'lidagi muz ostida baliq ovlaganini eslaydi. Biroq Viskonsin shtatidagi ushbu suv ombori va undagi GES 1917-yilda qurilgan. Shuningdek, Jek sevgilisiga Santa-Monikadagi Amerika tepaliklarida uchishni va'da qiladi, vaholanki bu attraksion ham “Titanik” halokatidan to'rt yil o'tib bunyod etilgan.

Rouz qutqarilgandan so'ng, uning qaylig'iga xizmat qiluvchi malay — Spayser (Devid Uorner) Jek bilan masalani uzil-kesil hal qilmoqchi bo'ladi va qahramonligi uchun unga pul taklif qiladi. Uning qo'lidagi yigirma dollarlik kupyuraning burchagidagi raqamlar joylashuvi bu banknotaning 1914 yoki 1918-yilga tegishli ekanligini ko'rsatadi.

Biroq qahramonlar suzib ketayotgan Amerika kelajakka undan ham tezroq qadam qo'ygan chamasi. Rouz nihoyat Nyu Yorkka yetib kelganida, u yorqin porlab turgan mash'alali yashil Ozodlik haykalini ko'radi. Aslida esa 1912-yilda haykal hali dastlabki jigarrang tusida bo'lgan, mash'alaning ichki yoritkichlari esa faqatgina 1986-yilda o'rnatilgan.

Payqash qiyin bo'lgan yana bir tarixiy xato — birinchi klass yo'lovchilari cherkov xizmati paytida kuylagan qo'shiqdir. Bu asarning o'zi kema yo'lga chiqqan vaqtda ma'lum bo'lgan, ammo jamoaviy duo paytida ijro etilgan kuplet faqat 1930-yillarda paydo bo'lgan.

Keyt Uinsletning qahramoni oliy jamiyat vakili bo'lishdan charchaganini har tomonlama namoyish etadi. Masalan, u nonushta paytida tamaki chekadi. Bu esa o'sha davrda o'ta madaniyatsizlik hisoblangan.

Biroq ba'zida tomoshabinda “bu qiz XX asr boshidagi erkin ayolmi yoki kelajakdan kelgan mehmonmi?” degan shubha tug'iladi. Cherkovdagi yuqorida aytilgan sahnada Rouz shlyapasiz o'tirgan yagona ayoldir. Agar tamaki chekishni jamiyatga qarshi isyon deb baholash mumkin bo'lsa, u holda 1960-yillardan oldin cherkovda bosh kiyimsiz o'tirishni tasavvur ham qilib bo'lmasdi. Shuningdek, u labiga yorqin qizil bo'yoq surtadi — 1910-yillarda bunga faqat yengiltak ayollargina jazm eta olgan.

Rouzning vaqt bo'shlig'ida sayohat qilganiga yana bir ishora — uning kemaning o'lchamlari haqidagi suhbatdagi gapi. U Bryus Ismeydan doktor Freyd haqida eshitgan-eshitmaganini so'raydi. Ismey bu haqda eshitgan bo'lishi mumkin emasdi, chunki Zigmund Freyd o'zining mashhur ilmiy ishini 1920-yilga kelibgina e'lon qilgan.

Foto: Google Images

Katta loyihalarda odatiy hol bo'lganidek, filmda son-sanoqsiz dubllar tufayli yuzaga kelgan texnik xatolar ham kam emas. Bu birinchi navbatda qahramonlarning kiyimi va soch turmagiga tegishli. Masalan, Jek kishanlarni bolta bilan chopayotgan kadrda ko'ylagidagi “podtyajka” birdan g'oyib bo'lib qoladi. Shunga qaramay bu kabi mayda detallar iste'dodli Jeyms Kemeron tomonidan suratga olingan ushbu ajoyib asardan oladigan taassurotni aslo buzolmaydi.

Manba: Daryo.uz

Instagram: Poyezdda konsert bergan Munisa Rizayeva, to'yga chiqayotgan Maryam Tillayeva, Shahlo Salayevaning turmush o'rtog'iga syurprizi

Jahon va o'zbek shou-biznesi vakillarining Instagram sahifalariga joylashtirilgan qiziqarli foto va videolarini e'tiboringizga havola qilamiz.

Kino va teatr aktyori Muhammadiso Abdulhairov 16-avgust kuni 56 yoshni qarshiladi.

Foto: Instagram

Dizyaner, bir nechta bizneslar egasi Diyora Usmonova “Saadi” nomli yangi parfyumini namoyish qildi.

Aktrisa Feruza Yusupova va turmush o'rtog'i instabloger Abduvali Sahiyev qizi bilan oilaviy vaqt o'tkazmoqda.

Munisa Rizayeva poyezddagi yo'lovchilar uchun jonli konsert qo'yib berdi.

Qiziqchi Hojiboy Tojiboyevning qizi Madinaning oilasida xursandchilik — uning o'g'li Miran 1 oylik bo'ldi.

Instabloger Bobur Mansurovning rafiqasi Fariza oilaviy suratini obunachilari bilan bo'lishdi.

Raqqosa Parizoda qizlari E'zoza va Sa'diyaning xursandchiligi u uchun barcha narsadan ustunligi haqida yozmoqda.

Xonanda Shahlo Salayeva turmush o'rtog'i Veysel Dulgerga noodatiy sovg'a hozirladi — u sun'iy intellekt orqali o'zlarining sevgi tarixi aks etgan video tayyorladi.

Aktrisa Nigina Jabborova yangi fotosessiya uyushtirdi hamda obunachilaridan ayollarning go'zallik siri haqida fikrlarini so'ramoqda.

Aktrisa Shahlo Zoriova sun'iy intellekt orqali o'zini o'tgan asrda Rim ko'chalarida tasvirladi.

O'zbekiston birinchi prezidentining nabirasi, instabloger Maryam Tillayeva to'yda qo'shiq kuylayotgani aks etgan videoni ulashdi.

Manba: Daryo.uz

Raqqos bo'lishdan voz kechib, kino afsonasiga aylangan mashhur fransuz aktyori Pyer Rishar 92 yoshda

2026-yilning 16-avgust kuni buyuk fransuz aktyori Pyer Rishar 92 yoshini nishonladi. Mashhur aktyor o'zbek tomoshabinlariga “Omadsizlar”, “Qora poyabzal kiygan mallasoch”, “O'yinchoq”, “Otalar”, “Qochoqlar” kabi filmlar orqali yaxshi tanish.

Asli badavlat odam bo'lgan, chinakam qasrda o'sib-ulg'aygan Pyer Rishar qanday qilib shu qadar sevimli bo'lib qolganini tushuntirib berish qiyin. U kelishgan ham, zamonaviy ham emasdi, aksincha doim bema'ni va kulgili ko'rinardi. Hajviy qobiliyati tufayli maktab paytidayoq tanilgan. Otasi oilasini tashlab ketgach, uning tarbiyasi bilan ota tomondan bo'lgan qattiqqo'l bobosi shug'ullanadi. Ona tomondan bo'lgan bobosi esa dengizchi va bezori bo'lgan, agar nabirasi kutilmagan ishlar qilsa, doimo xursand bo'lardi — ularning ikkalasi ham baliq ovlashni yaxshi ko'rardi.

O'zbek tomoshabinlarining sevimlisiga aylangan “O'yinchoq” filmi Fransiyada unchalik muvaffaqiyat qozonmaydi, film prokati ham o'rtacha bo'ladi. Balki, ularga bolaning katta yoshdagi erkakni sotib olishi va uni o'zining jonli o'yinchog'iga aylantirishi haqidagi film haddan tashqari jiddiy tuyulgandir.

Filmda kichkinagina odamning katta firma va katta pul oldidagi ojizligini his qilish tuyg'usi juda yaxshi tasvirlangan. Lekin Rishar “O'yinchoq”da zo'r o'ynagan bo'lsa-da, o'zi hech qachon hech kimning qo'g'irchog'i bo'lmagan va rolini yo'qotadigan hech narsasi yo'q odam kabi dadillik bilan ijro etgan.

Sabr-toqat, qiyinchiliklar qarshisida tabassum, yutib chiqishga bo'lgan umid... Bularning hammasi uning g'alabasiga yordam beradi. Masalan, u ajoyib raqqos edi. Uni hatto Moris Bejar truppasiga taklif qilishadi. Lekin o'sha paytda aktyorga Parij barlarida komik sifatida chiqish qilish ko'proq ma'qul tushgandi. Shuning uchun ham u truppaning taklifini rad etadi.

Uning qahramonlarini unutib bo'lmasdi. Qizig'i shundaki, “Qora tuflidagi mallasoch daroz” komediyasining finalida Rishar qahramoni aeroportda halok bo'lishi kerak edi. Lekin omadsizlik timsoli bo'lgan, devorda Rahmaninovning portreti, javonda rus matryoshkalari turgan kvartirada yashovchi Fransua Pyer hatto ssenariychilarni ham yengishga muvaffaq bo'ladi: uni o'ldirishmaydi, uning uchun film davomini suratga olishadi.

Albatta, Jerar Depardye bilan ijro etgan rollarini eslamaslikning iloji yo'q. Darvoqe, ular partnyor bo'lmasligi ham mumkin edi. Dastlab “Omadsizlar”da Lino Venturaning ishtiroki nazarda tutilgandi. U uzoq vaqt o'ziga sherik qidirib, nihoyat Risharda to'xtaydi.

To'satdan Ventura gonorarni shunaqangi oshirib yuboradiki, Frensis Veber shosha-pisha uning o'rniga boshqa aktyor qidira boshlaydi va Depardyeni taklif qiladi. Gaplashib olish uchun uni Rishar bilan birga kechki ovqatga chaqiradi. Rishar chala-chulpa ovqat yer, non uvoqlari har tomonga sochilib ketardi, Depardye hayratda edi, Veberga esa bu kulgili manzara allaqachon yoqib qolgandi.

Hayotda Rishar haqiqiy gurman, muvaffaqiyatli vino ishlab chiqaruvchi, ikki o'g'il — Olivye va Kristofning otasi. U o'zidan 30 yosh kichik va tanishishganida hatto fransuz tilini ham bilmaydigan go'zal braziliyalik ayolga uylangan. Aktyor kitoblar ham yozadi — ilk kitobi “Xaltasi yo'q kenguru” deb nomlangan. U ilgari Sena sohilidagi barja (shatakka olib yuriladigan yuk kemasi)da yashardi, u yerda o'ziga uch xonali uy qurib olgandi, keyinchalik esa Parijga ko'chib o'tadi. Hozirda Rishar to'rt nabiraning sevimli bobosi.

Pyer Rishar ishtirok etgan eng yaxshi komediyalar:

“Qora tuflidagi mallasoch daroz” (1972)

Syujet: Kamtar skripkachi Fransua Perren tasodifan fransuz razvedkasining maxfiy topshirig'iga aralashib qoladi va uni beixtiyor yashirin josus deb o'ylashadi. Ammo Fransua bundan bexabar holda barcha tuzoqlardan o'tib, eng yaxshi fransuz agentlarini yenga oladi (va bu yo'lda u bilan haqiqiy sevgini topadi).

Fakt: 1985-yilda mazkur fransuz filmiga taqlidan Gollivudcha variant ishlandi — “Qizil tuflili odam” komediyasida bosh rolni Tom Xenks ijro etgan.

Pyer Risharning birinchi va eng mashhur roli. “Qora tuflidagi mallasoch daroz” klassik kinokomediyasi haqida.

“Aqlingni yo'qotma” (1972)

Syujet: Pyer oddiy odam (Risherning o'zi emas, balki uning qahramoni Vidal) ikki kunlik ta'tilda oddiy bank xodimidan direktor o'rinbosarigacha borishga muvaffaq bo'ladi. To'g'ri, unchalik muvaffaqiyatli emas: haqiqiy menejer ta'tilda bo'lgan paytda, firibgarlar bankdan qimmatli hujjatlarni o'g'irlashga qaror qilishadi. O'z vazifalarini vijdonan bajarishga o'rgangan Pyer ularning orqasidan ta'qib qila boshlaydi.

Fakt: Richardning filmdagi partnyori betakror aktrisa Jeyn Birkin edi, u o'ttiz yil o'tgach, “Bevangiz bilan tanishing” filmida rol ijro etadi.

Syujet: Fransua Perren tom ma'noda millioner bola uchun o'yinchoq bo'ladi. Qisqa muddatda bir boyning uyiga joylashib olgan ishsiz jurnalist 10 yoshli bolaning naqadar yolg'izligini tushunishga va uning eng yaqin do'stiga aylanishga muvaffaq bo'ladi.

Fakt: Erik rolini o'ynagan Fabris Greko filmga tasodifan kelib qolgan — u suratga olish jamoasi a'zolaridan birining o'g'li edi. Ajoyib ijrosi va filmning xalqaro muvaffaqiyatiga qaramay, u boshqa filmlarda rol o'ynamagan.

Syujet: advokat Jan Durok o'lim jazosiga hukm qilinganlarni ko'rish uchun qamoqxonaga tashrif buyuradi. Aynan shu vaqtda oldindan tayyorlangan mahbuslar qo'zg'oloni boshlanadi, ayblanuvchi va himoyachining hamma bilan qochib ketishdan boshqa iloji qolmaydi.

Fakt: film Fransiyada talabalar tomonidan uyushtirilgan ommaviy tartibsizliklar va 10 million ishchilarning ish tashlashi va oxir-oqibat prezident De Gollning iste'foga chiqishiga olib kelgan 1968-yildagi ijtimoiy inqirozni aks ettirgan. Xususan, filmda prezidentning xalqqa qilgan murojaatlaridan foydalanilgan va prezident vertolyotining Baden-Badendagi fransuz qo'shinlari joylashgan joyga jo'nab ketishi tasvirlangan.

Syujet: rejissor va ssenariy muallifi Frensis Veberning mazkur kartinasi quvnoq sheriklar — ahmoq Fransua Perren va o'ta mas'uliyatli detektiv Jan Kampan taniqli biznesmenning qizini qidirishi haqida hikoya qiladi. Vazifa oddiy: doimo muammolarga o'ralashib yuradigan Perren instinkti yordamida qizning iziga tushishi kerak, Kampan esa qidiruv operatsiyasining muvaffaqiyatini ta'minlashi lozim. Bir qator kulgili vaziyatlar va sarguzashtlardan so'ng “agentlar” yo'qolgan qizni topadi.

Fakt: Jerar Depardye bosh qahramon rolini o'ynashni shunchalik xohlaydiki, film ijodkorlari unga qat'iy rad javobini berishganida, u xafa bo'ladi va suratga olish jarayonida tartibsizliklar keltirib chiqara boshlaydi: u spirtli ichimliklar ichadi, ish jadvalini buzadi, arzimas kadrlarni qayta-qayta suratga oldiradi. Ammo bir kuni suratga olish paytida aktyorni haqiqiy chayon chaqib oladi.

Syujet: o'smir yigit qiz do'sti bilan uydan qochib ketadi va hayajonlangan ona politsiyaga emas, balki o'zining ikki sobiq oshig'iga xabar qilishga qaror qiladi. U har bir erkakka bolaning haqiqiy otasi u ekanligi haqida aytib, ularni qidiruvga jo'natadi.

Fakt: “Otalar” filmini 1983-yilda deyarli 5 million odam tomosha qiladi va u Fransiyada eng mashhur komediyalar ichida to'rtinchi o'rinni egallab, prokat bo'yicha muvaffaqiyat qozonadi.

Syujet: Fransua Pinyon va unga o'xshagan odamlar uzoq vaqtdan beri ishsizlik nafaqasi bilan yashab kelmoqda. Onasi vafotidan keyin tildan qolgan qizini davolatish uchun u bankni o'g'irlashga qaror qilib, muvaffaqiyatsizlikka uchraydi. Tasodifan u yaqindagina qamoqdan chiqqan tajribali o'g'ri Jan Lyukni garovga oladi. Bir-birini tanimaydigan sheriklar qochib ketishga muvaffaq bo'lishadi, Fransua va Jan politsiyadan yashirinib, aqlbovar qilmaydigan vaziyatlardan chiqib ketishayotganda haqiqiy mo'jiza sodir bo'ladi: kasal qiz uzoq vaqtdan beri birinchi so'zlarini aytadi.

Fakt: uch yil o'tgach, Veber “Uch qochoq” nomli filmining Gollivud remeykini suratga oladi. Fransuz filmidan aynan ko'chirilgan mazkur filmda Nik Nolte va Martin Short rol o'ynagan.

“Janob Shtayn ushrashuvga chiqadi” (2017)

Syujet: 75 yoshli beva erkak darveshona hayot tarzini olib boradi. Oila a'zolari qariyaning hayotini yanada yorqinroq qilish uchun unga kompyuter sovg'a qiladi. U haqiqatan ham tez orada chat orqali bir ayol bilan tanishadi. Ijtimoiy suhbat va yoqimli xulq-atvor bilan u yosh go'zal qizni o'ziga maftun qiladi. Faqat bir muammo bor — janob Shtayn profilini to'ldirishda ba'zi ma'lumotlarni yashirgan va uning maftunkor tanishi kim bilan uchrashishini bilmaydi ham.

Fakt: Ushbu filmda Pyer Rishar bilan birga yana ikki ajoyib fransuz aktyori — Yanis Lespere (“Ism”) va Fanni Valett (“Molyer”) ishtirok etgan.

Manba: Daryo.uz

“Boshqa birovga nasib qilishi kerak bo'lgan insonni tanlab 11 yilimni yo'qotdim” — Qunduzxon Abdullayeva o'xshamagan turmushi haqida

Tele va radioboshlovchi, bugungi kunda Instagram'da fudblogerlik bilan ham shug'ullanib kelayotgan Qunduzxon Abdullayeva “Darakchi” nashrining YouTube kanali uchun intervyu berdi. Bo'lib o'tgan suhbatda u 11 yillik turmushidan farzandsizlik sabab ajralgani, oilada sevgi-muhabbat bo'lishi kerakligi hamda niyatning kuchi haqida gapirdi.

“Boshqa insonga nasib etishi kerak bo'lgan insonni tanlagan ekanman”

Foto: Skrinshot

— Aksariyat o'zbek ayol-qizlari bolalikdan chida, sabr qil, degan so'zlarni eshitib katta bo'lganmanmiz. Lekin buning o'ziga yarasha plyus va minus tomonlari bor. Insonga umr bir marta beriladi. Keyinchalik ko'p hollarda ota-onamizni ayblaymiz, lekin ular ham hayotda birinchi marta yashayapti. Qolaversa, “inson” so'zining o'zi “xato qiluvchi” ma'nosini anglatar ekan. Shuning uchun ham xato qilamiz: kimdir shu xatolardan o'rnak oladi, kimdir esa sinadi.

Aslida boshqa insonga nasib etishi kerak bo'lgan insonni tanlaganim 11 yillik umrimni oldi. Yo'llarimiz ajralgandan so'ng o'z ustimda ishladim va tushundimki, biz mana shu yo'lni birga bosib o'tishimiz kerak ekan. Xuddi ertaklarda g'alaba qozonish uchun qiyinchiliklarni boshdan kechirgani kabi bu voqealar hayotimda sodir bo'lishi shart bo'lgan. Ya'ni nimagadir erishish uchun hayotning qaysidir bosqichlarini yashab o'tish kerak ekan. Bu narsa kimnidir sindirsa, kimnidir kuchli qiladi. Mana shu fikrlar hayotim haqida xulosa chiqarishimga sababchi bo'ldi.

“Vaqt ortga qaytganida sobiq turmush o'rtog'imni tanlamagan bo'lardim”

Foto: Instagram

— Agar hayotim shunday kechishini bilganimda, vaqt ortga qaytsa sobiq turmush o'rtog'imni tanlamagan bo'lardim, balki. To'g'ri, u bilan yomon yashamadik. Lekin oila qurganingizdan so'ng o'zingizdan zurriyot qoldirish, avlodingizni davom ettirish kabi go'zal ne'mat bor. Mana shu narsa bizga nasib qilmadi — 11 yil shuni kutdik. Holatimni ko'proq farzandi yo'q oilalar tushunadi.

O'tgan yillarimiz kutish yillari bo'ldi. Bu davr maqsad va niyatlarni amalga oshirish uchun harakatlar bilan o'tdi, ammo natija bo'lmadi. Ba'zi insonlar bir kunda, bir daqiqada niyatiga erishadi. Lekin men uchun bu jarayon 11 yil vaqtni oldi va baribir farzandli bo'lolmadik. Har taraflama o'ylab ko'rilgandan keyin chiqarilgan xulosa — ajrim bo'ldi. Bu qarorga kelish oson kechmadi.

“Turmushim o'xshamaganini hech kimga aytmaganman”

— Ajrashganimizga uch yil bo'ldi. Boshida turmushim o'xshamaganini hech kimga aytmaganman. Faqat atrofimdagi yaqinlarim bilardi, xolos. Hattoki hamkasblarimga ham bu haqda gapirmaganman.

Men to'rt yil birga tahsil olgan, ikki yil bir joyda ishlagan kursdoshim — Ozod Ravshanga turmushga chiqqanman. Aslida u do'stim bo'lgan. Men qalb birlashuvi bilan emas, aqlan qaror qabul qilib, 25 yoshimda turmushga chiqqanman. Sababi — ichmaydigan, chekmaydigan, qolaversa, olti yildan buyon biladigan insonim deb oila qurganman. Bizda sevib-yonib, o'lib-kuyib turmush qurish bo'lmagan, doim o'rtoq bo'lib yurganmiz. Shuning uchun hali turmush qurmagan qizlarga hech qachon do'stiga turmushga chiqmaslikni tavsiya qilaman. Chunki oila qurganingizdan keyin ham sevgi-muhabbat emas, faqat do'stona munosabat qolar ekan.

Oilada sevgining bo'lishi muhim. Chunki sevgi bor joyda o'sha insonning kamchiligi ko'zingizga ko'rinmaydi. Sevgi yo'q joyda esa uning yutuqlari ham ba'zan nuqsonday tuyuladi. Bir-birini tushunib yashash, juftining salbiy xarakteriga ko'nikish uchun o'rtada tuyg'u bo'lishi kerak ekan. Er-xotin ikkisi baravar harakat qilmasa, sevgi ham uzoq davom etmaydi.

“Yillar davomida munosabatlarimiz sovib boraverdi”

— Ajralish qaroriga kelishimizning asosiy sababi — yillar davomida munosabatlarimizning sovib boraverishi bo'ldi. Farzand oilada er-xotin munosabatlarini ushlab turadigan ne'matdir. Ammo farzandi bo'la turib, ajrim yoqasiga kelganlarni ham ko'rganman.

Orada yana shunday vaziyatlar bo'ldiki, er-xotin bir-birimizdan sovib ketdik. Xuddi qo'shnidek yashashni boshladik. Avvallari er-xotin qo'shnidek yashayapti, deyishsa tushunmasdim. Lekin afsuski, bugun shunday yashayotganlar bor. Ya'ni munosabatlar butkul so'ngan, faqat odamlar ko'zida er-xotin bo'lib yurishibdi.

“Ota-onamning ajralishi og'riqli nuqtam bo'lib kelgan”

— Olti yosh paytimda ota-onamning ajralishi yillar davomida og'riqli nuqtam bo'lib kelgan. Shuning uchun turmushga chiqishimdan avval doim bolalarni yaxshi ko'radigan erkakka turmushga chiqish niyatim bor edi. “Meni emas, birinchi navbatda bo'lajak farzandlarimni yaxshi ko'rsa bo'ldi”, derdim. Ayamga shu gapni aytganimda “Unday demang, avval sizni, so'ng siz dunyoga keltirgan bolalarni yaxshi ko'rsin”, deb urishib berganlar. O'sha paytda bu gapning tagida qanday ma'no yotganini bilmaganman. Kattalar aytishganidek, niyatni to'g'ri va to'liq qilish kerak ekan. To'g'ri niyat qilishni bilmaganman, aslida ko'p narsa o'zimga bog'liq bo'lgan. Xuddi shu niyatda sobiq turmush o'rtog'im bilan oila qurganman. U ham bolalarni juda yaxshi ko'rardi. Ammo u insonga farzand tug'ib berolmadim.

“O'n bir yil ichida tekshirtirmagan tahlilimiz qolmagan”

— Shuncha yil ichida qanday kunlarni boshimdan o'tkazganimni o'zim bilaman. Har taraflama tekshiruvlardan o'tganmiz. Oxirgi marta o'ta kuchli tekshiruvdan o'tganimizda, tibbiyot tomonlama bir-birimizga to'g'ri kelmasligimiz haqida xulosa chiqdi. Shifokor buning ham iloji borligini aytdi-yu, lekin aniq yechimini ko'rsatmadi.

“Erkak kishi xohlagan payt uylanib olishi mumkin”

— Shundan keyin yoshim o'tib borayotganini, ajrashishim kerakligini yana ham ko'proq o'ylay boshladim. Buni kattalar ham allaqachon miyamga singdirib bo'lishgandi. Erkak kishi xohlagan payt, hatto 18 yoshli qizga uylanib, farzandli bo'lishi mumkin. Atrofimdagi, ishxonamdagi katta ayollar: “Ayol kishining reproduktiv yoshi chegaralangan, farzandli bo'lib qolishing kerak”, deb aytishardi. Bu qadamni 11 yildan keyin emas, tezroq tashlashim kerak bo'lgan.

“Ota-onasi ajrashgan, mana qizi ham ajrashyapti”, degan gaplardan o'zimni himoya qilish uchun ham shuncha vaqt birga yashashda, umid qilishda davom etdim. Lekin qars ikki qo'ldan chiqadi. Men harakat qilganim bilan u tarafdan harakat bo'lmasa yoki ular tomondan harakat bo'lsa-yu, men allaqachon sovigan bo'lsam, hech qachon oila bo'lmas ekan. Shuning uchun ajralishga qaror qildim, bu mening shaxsiy qarorim edi.

“Ertaga hamma o'zining hayoti bilan bo'lib ketadi”

— Bir kuni ertalab turib, sobiq erimga ajralish uchun ariza topshirib kelishimizni aytdim. Sababi butun oila a'zolarimni bir tarafga, o'zimning kelajagimni esa ikkinchi tarafga qo'yib ko'rdim. Ertaga o'zim yolg'iz qolib ketaman. Akam o'zining oilasi, bolalari bilan, ukam ham o'z oilasi bilan, ayam ham o'z hayoti bilan yashaydilar. Lekin men nima qilaman? Ertaga farzandsiz, bir o'zim yolg'iz qolib ketamanmi?, deb mulohaza qildim. Faqat farzandli bo'lish ishtiyoqi meni ajrimga olib bordi, deb o'ylayman.

“Bola ham munosabatlarni saqlab qola olmadi”

— Turmushimizga to'qqiz yil bo'lganda ularning qarindoshlari tomonidan chaqalog'ini berish taklifi bo'ldi. O'shanda: “Demak, Alloh oilamizni shu orqali saqlab qolmoqchi”, deb bunga rozi bo'ldik va chaqaloqni oldik. Bir tarafdan bundan juda ham xursand bo'ldim, ikkinchi tomondan menga juda mas'uliyatli vazifa yuklatilayotganini bildim. Bolani tug'uruqxonadan to'g'ri olib kelib berishdi va unga mehrim tushdi. Uni o'z bolamdek ko'rib, Instagram'ga ham rasmlarini joyladim. Har doim kadrda ko'ringan ayol bo'lganim uchun ko'p savollar bo'ldi, lekin hech qaysi savolga javob bermadim.

Biroq hatto bola ham oilamizni saqlab qola olmadi. Ikkalamiz ham unga mehr-muhabbat berdig-u, lekin bir-birimizni unutib qo'ydik.

Shu yerda yana bir niyatni noto'g'ri qilganimni anglab yetdim. Avvallari ko'chada bolalar aravachasini yetaklab yurgan, sport uslubida kiyingan onalarni ko'rsam: “Xudo xohlasa, mening ham bolam bo'lsa, shulardek sayr qilib yuraman, ishdan tug'uruq ta'tiliga chiqaman”, deb rosa orzu qilardim. Lekin homilador bo'lishning o'zini tasavvur qilmagan ekanman. Qizlarimizga niyatni to'g'ri qilishni o'rgatishimiz lozim. Chunki o'zim ham xuddi tasavvur qilganimdek, bola bilan sport kiyimida sayr qilib yurdim, biroq homiladorlik davrini va uning his-tuyg'ularini boshdan kechirmadim. Shifokorlarning yakuniy xulosasidan keyin so'nggi umidim ham so'ndi, hattoki bola ham ko'zimga ko'rinmadi, deydi Qunduzxon Abdullayeva.

Manba: Daryo.uz