MMA jangchisi Shahzod Gold 3,5 yilga qamaldi

Toshkent shahar sudi kassatsiya instansiyasi qarori bilan ijtimoiy tarmoqlarda Gold nomi bilan tanilgan Shahzod Uzoqovga nisbatan tayinlangan ozodlikni cheklash jazosi ozodlikdan mahrum qilish jazosiga o‘zgartirildi. Bu haqda sud rasmiy bayonot bilan chiqdi.

Ma’lum qilinishicha, 2025-yil 7-noyabr kuni jinoyat ishlari bo‘yicha Olmazor tumani sudi Uzoqov va N.Quldoshevni bezorilikda aybdor deb topib, ularga 3,5 yildan 4 yilgacha ozodlikni cheklash jazosi tayinlagan. Tergovda aniqlanishicha, ular yo‘l talashish ortidan kelib chiqqan janjalda fuqaroga nisbatan kuch ishlatgan, ajratmoqchi bo‘lgan yana bir shaxsni ham urib, tan jarohati yetkazgan hamda voqea joyidan yashiringan. Hodisa davomida jabrlanuvchining qimmatbaho telefoni ham shikastlangan.

Kassatsiya instansiyasi sudlov hay’ati jinoyat kvalifikatsiyasi to‘g‘ri berilganini tan olgan holda, tayinlangan jazo turiga rozi bo‘lmadi. Sudlanuvchilarning avval ham shunday turdagi jinoyatlar uchun javobgarlikka tortilgani, shuningdek, ular professional MMA sportchilari ekani inobatga olinib, ularning jismoniy ustunligi va mas’uliyati yuqori bo‘lishi kerakligi alohida ta’kidlandi.

Shu asosda birinchi instansiya hukmi bekor qilinib, har ikki shaxsga nisbatan 3,5 yil ozodlikdan mahrum qilish jazosi tayinlandi va ular sud zalidan qamoqqa olindi. Sud ularning avval o‘tagan muddatlari yangi jazodan chegirib tashlanishini ham belgiladi. Qayd etilishicha, ushbu bayonot yakuniy xulosa emas va tomonlar belgilangan tartibda shikoyat kiritish huquqiga ega.