Anomal issiq Fransiya futboliga jiddiy xavf solmoqda — Footmercato

Iqlim o'zgarishi Fransiyada futbol uchrashuvlarini o'tkazish jarayoniga bevosita tahdid solmoqda. Footmercato nashri xabariga ko'ra, Fransiya futbol federatsiyasi (FFF) tomonidan buyurtma qilingan va L'Équipe nashri o'rganib chiqqan tadqiqot natijalari shuni ko'rsatadiki, fransuz klublarining 93 foizi ob-havo sharoitlari yomonlashgani tufayli o'yinlarni boshqa kunga qoldirish muammosiga duch kelgan.

Mutaxassislar tadqiqot davomida futbol uchun beshta asosiy iqlim xavfini ajratib ko'rsatgan: bular haddan tashqari issiqlik, qurg'oqchilik, kuchli momaqaldiroqlar, qishki davrdagi yog'ingarchiliklar hamda suv toshqinlaridir.

Mutaxassislarning xulosasiga ko'ra, 2030-yilga borib vaziyat yanada yomonlashishi kutilmoqda. Anomal issiq harorat tufayli 300 ming soatdan ortiq mashg'ulotlar va yig'inlarni o'tkazish so'roq ostida qoladi, shuningdek, yil davomida o'rtacha 112 kun futbol maydonlarining qariyb yaroqsiz holatga kelishi qayd etiladi. Qolaversa, ayni damda Fransiyadagi futbol maydonlarining qariyb uchdan bir qismi suv toshqini xavfi yuqori bo'lgan hududlarda joylashgan. Klublar tabiiy qoplamalar o'rniga sun'iy maysalardan foydalanishi ham muammoni to'liq hal etmaydi. Tadqiqotlar shuni ko'rsatadiki, bunday qoplamalarning harorati havo haroratidan 30 gradusgacha yuqoriroq bo'lishi mumkin. Ya'ni, atrof-muhit harorati 40 gradusga yetganda, sun'iy maysa 70 gradusdan yuqori darajagacha qizib ketadi va unda futbol o'ynashning imkoni bo'lmaydi.

2100-yilga oid taxminlar esa bundan-da xavotirli ekani aytilmoqda. Tadqiqotlarga ko'ra, tabiiy qoplamali maydonlarning 86 foizi yiliga kamida 80 kun davomida qurg'oqchilikdan aziyat chekishi mumkin. Ayrim hududlarda ob-havo injiqliklari sababli yiliga qariyb uch oy davomida futbol o'yinlarini normal holatda o'tkazish mutlaqo imkonsiz bo'lib qoladi. Ushbu jiddiy ekologik tahdidlar fonida Fransiya futbol federatsiyasi vaziyatga moslashish choralarini ko'rishni boshlagan. Federatsiya 2026-yilning ikkinchi yarmida iqlim o'zgarishlariga qarshi o'zining yangi strategiyasi hamda yangilangan protokollarini ommaga taqdim etishni rejalashtirmoqda.

Manba: Daryo.uz